KAN CHHAN HMAN LO CHE HI PAWI KAN VA TI EM!

Kolasib Dt. 28th July, 2017: Vawiin chhun dar 11:00AM vel bawr khan St. Johns' H.S.S. chuan an sikul ațanga bul țanin Diakkawn Square thleng an zirlaipui vaiin nimin, Dt. 27/7/2017, tlaia a sikul bang a lo khawih bawrhban an duh lohzia entirna'n Silent Protest March an nei a. Kolasib mipui an vel! 

He kawngzawhah hian St. Johns H.S.S. hi mi țhahnemngai ten an zui ve bawk avangin Kolasib a kawngzawh awm tawha mipui intlar thui ber țum a ni hial mai thei.. 

Sikul naupang khatiang zah lai mai leh an mahni țawiawmtu te ngui nghiai mai khati zât rawn kal ta duah duah mai pawh khan mi a velh hnem tawh tehreng nen Banner lianpui maia "KAN CHHAN HMAN LO CHE HI PAWI KAN VA TI EM.." tih an rawn tar kuau mai phei kha chuan patling meuh pawh mit a hruk tir zauh zauh hlawm a nih kha.. 

Tlar hma lama vanduaina tawk ta sikul naupang țhiante leh classmate te ni awm tak, Banner hnung lawka rawn kala lungchhe lutuka rawn insut hlawp hlawp mai te, mittui hru a rawn ngui nghiai mai te phei kha chu hmuh hrehawm ber a va ni tak em! 

A țawiawm hman lo te pawhin an zawn an kal chhung zawng an lo tawrhpui ani tih hriat takin an lo ding sap sap hlawm bawk nen, vawiin Kolasib boruak, he kawngzawhin a chim phak chin ho ngat phei chu a ngui ruai a ni ber e.. 

Bawihi, tunge i nih kan hre lo, hriat pawh kan tum hek lovang.. Mahse, kan chhan hman lo che erawh pawi kan va ti em.. Ka na a, kan sa a nih hi! 

Social Media ah chiah ni lovin a tak ramah kan ram hi kan hmangaih a, fing leh felfai taka kan hnam hi kan chhan a hun ta hle mai.

Sources: Champhai Special Report